Luh Juliani

Sasukat ia menék bajang, tusing bedik teruna-terunané ané kasmaran tekén paukudané. Tusing ja tuah ulian gobané ané ngenyudin utawi pagawakné ané séksi, nanging masi ulian panampilané ané ngulangunin. Ri kala ia netepang kenehné milih makurenan ajak Gedé Yudana, suba pasti liu terunané ané kuciwa, méhméhan ada masi ané sakit ati.

Masanding ajak nak muani ané tresnaina pastika ngaé kenehné bagia. Kanti Putu Gedé Sanjaya lekad, umahné setata kaias baan kedék lan kenyung. Nanging tusing makelo tan maa kulawargané lantas katibén bancana. Gedé Yudana nadaksara ngalahin mati tan pangaraksa sakit, pegat angkihané ri kala masaré lemahné di kamar. Dokter ané lantas nuréksa ngorahang ia gagal jantung.

Ento panyumuné kalaran ngudik idupné. Yéh paningalan buka tusing taén marérén melusin pipiné. Tur jani, disubané liwat telung tiban, bulakan yéh paningalan ané suba mekén tuh nu masi nyidang ngetélang yéh di bucun-bucun paningalané ané ngenahang kisut saru mapan ia ngancan meragang.

Suba nyaluk peteng dugas ento. Luh Juliani negak matimpuh di samping Nyoman Sekar, méméné, di duur tikeh pandan nganggon brokat putih tulang lan kamen batik. Bangkiangné kalilit baan senteng gadang ané tipis. Bokné ané bawak depanga magambahan nyibeh muané. Mua ané belusin yéh paningalan. Méméné ané sada mokoh matédoh, bokné ané pusungaga suba liu ubanan.

Kamar suci ané malinggah pat ping pat méter ento ngenah ngeremeng kasunarin lampu listrik dasa wot. Ambu miik andus dupa ané katancebang di tumpukan banten di duur méja panyawangané ngabekin kamar yadiastu kipas éksos ané mapasang di langit-langit kamaré terus mapiteh gencang. Tusing joh uli tumpukan bantené ada patung Ganésha mawarna putih maias baan prada emas. Di samping patung Ganéshané ento ada masi patung ané mesib Déwi Kwam In lan patung-patung ané lénan. 

“Wénten napi niki, Gék? Dados rauh kadi niki?” matakon anaké muani ané negak masila di maluné. Nganggon udeng putih, baju koko lan kamen ané patuh warnané, prabawané santep sajan, ngenah buka anak ané sirahné bekin papelajahan yadiastu tuuhné miribang mara séket tiban.

Luh Juliani ngusap pipiné ané belus aji jerijin limané satondén masaut, “Tiang mriki jagi nunas tulung ring Jero Mangku.”

Anak muani ané kaukina Jero Mangku mandrengin muan Luh Juliani ané nguntul sedih, laut matakon banban, “Indayang nikaang napi sané perlu tulungin tiang?”

“Sial gati nasib tiangé, Jero.”

“Wénten masalah napi?”

“Déréng makelo tiang mulih ka umah bajang.”

“Napi maksud Gék mulih ka umah bajang?”

Luh Juliani ngawit nuturang pajalan idupné ané pait. Sasukat somahné ngalahin mati, matuané nadaksara brangti tekén paukudané. Ia kadalih ngamatiang kurenané padidi. Tusing kapineh baana nguda dadi ia bisa kadalih buka kéto apabuin lantas ada orta di sisi ia orahanga bisa ngléak. Tusing ja kéto dogén, ia lantas ulihanga ka umah mémé-bapané, lénan tekén inguh ningehang pakrimik pisagané, matuané marasa jejeh.

Jero Mangku anggut-anggut. 

“Tiang naen mireng, kocap wénten anak ten sadar yéning bisa ngléak. Yakti nika, Jero?”

“Nggih, wénten. Nika anak melik. Melik Durga wastané. Ciriné, biasané layahné macebleng selem. Pepes marasa ongkeb ri kala peteng yadian hawané dingin. Dina palekadané masi bisa dadi ciri, buka anak ané lekad nuju Kajeng Kliwon Enyitan utawi tumpek. Napi wénten ciri-ciri kadi nika ring ragan Gék?”

Luh Juliani kituk-kituk sangsi.

“Apang ten ragu, kayun masekén?”

“Masekén?”

“Driki wénten sarana marupa batu paican batara sané sungsung tiang. Aji ngamel batuné nika Gék jagi uning napi midep ngléak napi ten, utawi napi wantah ulian kencanin anak.”

Luh Juliani manggutan, “Nggih, dados.”

Jero Mangku bangun maekin méja panyawangané. Uli toplés kaca ané tusing matekep dané laut ngambil batu bulitan magedé amun gemelané. Batuné ento lantas gamela aji limané makadadua di malun tangkahné sinambi kemik-kemik mapakéling lakar nyelang batuné.

Makudang menit suba liwat, batu ané gamela tekén Luh Juliani tusing makada ia kuda kénkén.

Jero Mangku makenyem. “Gék ten ja midep ngléak. Ten wénten masi nak jail ané ngencanin. Yén Gék midep ngléak utawi kencanin anak, Gék janten kraik-kraik ten nyidaang naanang kebus.”

Disubané ngawaliang batuné ka toplésé, Jero Mangku buin masila sinambi mandrengin muané Luh Juliani, nyekenang, makada Luh Juliani gelip. “Napi ring ragan Gék wénten kadengan?”

Luh Juliani makesiab. “Wénten, nanging genahné...”

“Ring sarira?”

“Dados Jero uning?”

“Tiang sampun pepes ngarepin parindikan kadi niki. Nika wastané kadengan apit wangké.”

“Napi artiné, Jero?”

“Gék niki melik. Nanging ten perlu takut. Melik nika ciri anak madué kalebihan. Nika wantah midep mencanén yéning tan becik antuk ngaci.”

Luh Juliani tusing pesu munyi. Ia tusing mautsaha nyelag aji patakon ané sujatiné suba nénggél di muncuk layahné mapan ia meled sajan Jero Mangku ngalanturang pidartané.

“Anak melik nika dados rebutan déwa lan buta. Yening seleg ngaci ka déwa, sinah becik pikenohné. Nanging yéning tungkalikané, nika sané nekaang bancana.” 

“Ipun nak rajin mabanten tur mabakti, Jero,” Nyoman Sekar ané uli tunian mendep dogén lantas matempung.

“Nika déréng cukup manawi.”

“Déréng cukup sapunapi?”

“Perlu mabayuh taler.”

“Ring dija dados mabayuh? Napi saranané?”

“Deriki dados, ring genah lianan taler dados. Saranané wantah pejati.”

“Yén deriki, malih pidan dados?”

“Malih tigang rahina dados, ring Wraspatiné.”

Nyoman Sekar anggut-anggut. Sasmitané ngenah masriak galang. Ané pinehina jani tuah upakara marupa daksina lan étéh-étéhné. Upakara ané misi nyuh makelasin, taluh, baas, pis bolong lan ané lén-lénan.

Luh Juliani ngusap sisan-sisan yéh paningalan ané melusin muané aji muncuk sentengné.

“Gék patutné angayubagia,” Jero Mangku ngigetin.

“Jero! Kurenan tiangé sampun ngalahin, wusan nika tiang kapasahang sareng pianak tiang. Sapunapi antuk tiang angayubagia, napimalih tiang sampun tundunga kadi cicing berung.”

“Yéning Gék kari mapunduh jumah matuané, nak cerik Gék bisa masi ngemasin mati ulian Gék melik.”

“Kénten Jero?”

Jero Mangku anggut-anggut. “Wusan mabayuh, yéning Gék meled mawali ka umah matuané, rarisang. Yéning tetep jumah bajang taler ten kenapi. Sira uning nyanan malah polih jodo nak muani ané melahan.”

Luh Juliani bimbang. Yéning mawali ka umah matuané sinah ia lakar nyidaang mapunduh buin ajak pianakné Gedé Putu Sanjaya. Nanging, apaké matuané lakar nyak nerima? Kapineh baana lakar lascarianga kenehné mapasahan ajak pianakné sakéwala lakar tetep runguanga cara ipidan.

Buka raos Jero Mangku ibusan, nyén nawang mani puan sida katemu ajak nak muani ané sadia ngenyakin paukudané yadiastun suba balu. Ulesné nu ada nak muani lakar ngugu, kéto ia mapineh. Kadén déwéké nu ngenah cara nak bajang tur tusing mbuh jegégé. Ané pinih penting, kadengan magedé amun kacang ijoné di tongosé ané singid gati tusing buin ngaé pikobet. 7